اكله بدويه تحفه




طريقة عمل الرز الحمر اكله بدويه

بص ياسيدى الاكله دى بجد اكله تحفه بس جربها معايا مش هتخسر حاجه ولا تكلفه ولا حاجه كله من البيت هتقلى ايه علاقة الرز بالهندسه هقولك ان الهندسه غذاء للعقل والرز غذاء للبطن ما علينا نرجع تانى لموضوعنا انا هاشرحلك بالتفصيل الممل اللى يخلى ابنك او بنتك الصغيرين هما اللى يعملوها ما علينا

المكونات
  1. طبعا الفرخه الجميله او كيلولحم ضانى او بقرى 
  2. عدد اثنين بصله او ثلاثه
  3. ثلاثة معالق صلصه كبيره
  4. عدد ستة حباية طماطم
  5. عدد اتنين قرن فلفل حامى قرن اه قرن
  6. طبعا ملح وفلفل
  7. نصف كوباية زيت

خطوات العمل

بص هتقطع الفراخ او اللحمه الى قطع متوسطه وتحط كوباية الزيت فى الحله وتسيبه خمسه وبعدين اللحمه او الفراخ وتشوحها كويس جدا يعنى تشوحها شويه حلوين كل ما تشوح اكتر كل ما هتبقى النيجه فى الاخر احسن بعد ما شوحتها كويس الثلاث بصلات هبقى مقطعهم وبعدين احط البصل فى الحله واقلب كويس لحد البصل ما يبقى مستوى وبعدين بقا ايوه احط بقا ايه الصلصه بتاعتى واقلب بردو وبعدين احط الطماطم بعد مقطعتها زى السلطه كده واقلب شويه كويسين لحد الطماطم والصلصه واللحمه والبصل ميسبيكو كويس والطماطم بالذات تبقى مستويه كويس وبعدين بقا ياجماعه نحط الميه طبعا قد الرز اللى هاعمله وازود شوية ميه واحط الملح والفلفل الاسود وقرنين الفلفل الحامى واسيبها تغلى غلوتين تلاته كده عشان اللحمه نصف سوى وبعدين نحط الرز الجميل ونسيبه لحد ما يشرب الميه وبعدين نهدى النار عليه لحد ما يستوى وبالهنا والشفا 

يلا سلام بقا عشان انا جوعت 
اشوفكم فى معلومه جديده وخفيفه


إرسال تعليق

1 تعليقات

نرجو عدم نشر التعليقات المسيئه وعدم نشر روابط مخصصه خارجيه